ᓇᓂᔭᐅᓵᖅᑐᖅ ᓂᕐᔪᑎᕕᓂᖅ ᑕᑯᒃᓴᐅᑎᑦᑎᕗᖅ ᑎᓴᒪᓂᒃ ᓂᐅᓕᖕᒥᒃ ᐃᖃᓗᖕᒥ ᐃᒫᓄᑦ ᐅᑎᖅᑐᕕᓂᖅ ᑎᒃᑖᓕᒃ ᓄᓇᓕᐊᖅᑎᓪᓗᒍ
ᖃᐅᔨᓴᖅᑏᑦ ᓇᓂᓯᕗᑦ ᓂᕐᔪᑎᕕᓂᕐᒥᒃ ᐊᒃᑐᐊᓂᓕᖕᒥᒃ ᐊᓯᖏᓐᓄᑦ ᓂᕐᔪᑎᕕᓂᕐᓄᑦ ᐊᓯᔾᔨᖅᐸᓪᓕᐊᓲᓄᑦ ᓄᓇᒧᐊᕌᖓᒥᒃ, ᑭᓯᐊᓂᓕ ᑕᐅᑦᑐᐊ ᐃᒫᒍᑦ ᐳᐃᔾᔪᕌᕈᒥᓇᕐᓂᖅᓴᐅᓪᓗᓂ ᐃᒪᕐᒥᐅᑕᐅᔪᒥᓇᖅᖢᓂ.
ᖃᐅᔨᓴᖅᑏᑦ ᓇᓂᓯᓯᒪᓕᖅᑐᑦ ᐆᒻᒪᔪᕕᓂᕐᓂᒃ ᑎᒃᑖᓕᒃᑐᑦ ᑕᐅᑦᑐᖃᑲᓴᑦᑎᐊᖅᑐᓂᒃ, ᑎᓴᒪᓂᒃ ᓂᐅᓕᖕᒥᒃ ᐃᖃᓗᖕᒥᒃ ᐃᒪᕐᒥᐅᑕᕕᓂᐅᒐᓗᐊᖅ ᓄᓇᒥᐅᑕᙳᖅᑐᕕᓂᖅ 375 ᒥᓕᐊᓐ ᐅᑭᐅᑦ ᐊᓂᒍᖅᑐᓂᒃ. ᕿᑭᖅᑖᓗᖕᒦᑦᑐᖅ ᒥᑭᓚᐅᖅᑐᖅ − 30 ᐃᓐᓯᓂᒃ ᑕᑭᑎᒋᑐᐃᓐᓇᖅᖢᓂ−ᒥᒃᓴᐅᖦᖢᒍ ᑎᒃᑖᓕᖕᒧᑦ, ᑕᒃᖠᑎᒋᔪᓐᓇᖅᖢᑎᒃ 9 ᐃᓯᒃᑲᓄᑦ ᑕᒃᑎᒋᓕᕐᓗᑎᒃ. ᓇᓂᔭᐅᓵᖅᑐᑦ ᓂᕐᔪᑎᕕᓃᑦ ᐅᑯᐊᖑᓪᓗᑎᒃ ᐃᓚᐃᓐᓇᕋᓗᐊᖏᑦ ᖁᓪᓕᖅ ᐊᒻᒪ ᐊᓪᓕᖅ ᐊᒡᓕᕈᐊ, ᖁᖓᓯᖓᑦᑕ ᐃᓚᖓ, ᐊᒻᒪ ᐊᒥᕋᖓ. ᐱᒻᒪᕆᐅᓂᖅᐹᖑᓪᓗᓂ, ᑕᐅᑦᑐᖃᕐᒥᖕᒪᑦ ᐃᓗᐃᑦᑐᕐᒥᒃ ᓯᕗᓂᐊᓃᑦᑐᖅ ᑕᓕᕈᐊ ᐊᖏᔪᐊᓗᖕᒥᑦ ᓴᐅᓂᖃᕐᓂᖅᖢᓂ ᑐᙵᕕᒋᓪᓗᐊᖅᑕᖏᓐᓄᑦ ᓈᒻᒪᙱᖦᖢᓂ ᓇᓗᓇᐃᖅᓯᔾᔪᑕᐅᓇᔭᕋᓗᐊᖅᑐᒥᒃ ᓄᑭᖏᓪᓗ ᓇᒡᒍᐊᖏᓪᓗ ᓇᓃᒃᑲᔭᕐᒪᖔᑕ ᐊᕙᑎᖏᑦ ᐱᓱᖕᓂᐊᓕᕌᖓᑕ ᓄᓇᒃᑯᑦ. ᐃᒪᓐᓇᖔᕐᓕ, ᕿᑭᖅᑖᓂᐊᑉ ᑕᓕᐊ ᖁᓪᓕᖅ ᖃᐃᕋᖦᖢᓂ ᓴᖑᖓᓪᓗᓂᓗ, ᓈᒻᒪᖕᓂᖅᓴᐅᓪᓗᓂ ᐃᒫᓂ ᐳᐃᔾᔪᕋᕈᑎᒋᒋᐊᒃᓴᖅ.
Reconstruction by: Alex Boersma
ᓃᐅᓪ ᓲᐱᓐ, PhD, ᕌᐸᑦ R. Bensly ᐃᓱᒪᓕᐅᕆᔨᐅᓪᓗᓂ ᐱᔨᑦᑎᕋᖅᑎ ᐆᒪᔪᕕᓂᕐᓂᒃ ᖃᐅᔨᓴᖅᑎ ᐊᒻᒪ ᑎᒥᓕᕆᔨ Chicago-ᒥ ᓯᓚᑦᑐᖅᓴᕐᕕᒡᔪᐊᕐᒥ, ᓇᓂᓯᓚᐅᖅᓯᒪᖕᒪᑦ ᑕᒪᐃᓐᓂᒃ ᕿᑭᖅᑖᓂᐊ ᐊᒻᒪ ᑎᒃᑖᓕᖕᒥ ᓴᐅᓂᕕᓂᖏᓐᓂᒃ ᐅᓪᓘᖕᓂᒃ ᖃᓂᒌᒃᑐᓂᒃ 2004-ᖑᑎᓪᓗᒍ, ᐃᑦᑕᕐᓂᓴᖃᕐᕕᖕᒥ ᐊᐅᓱᐃᑦᑑᑉ ᕿᑭᖅᑖᓗᐊᑕ ᓂᒋᖅᐸᓯᐊᓂ, ᓄᓇᕗᒻᒥ, ᑲᓇᑕᐅᑉ ᐅᑭᐅᖅᑕᖅᑐᐊᓂ. ᑕᐃᒎᓯᖅ ᕿᑭᖅᑖᓂᐊ ᓴᖅᑭᓚᐅᖅᓯᒪᕗᖅ ᐃᓄᒃᑎᑐᑦ ᐅᖃᐅᓯᖅᑕᐅᓪᓗᓂ ᑕᐃᒎᓯᖅ ᕿᑭᖅᑖᓗᒃ ᐅᕝᕙᓘᓐᓃᑦ ᕿᑭᖅᑕᓂ, ᐱᖅᑯᓯᖅᑎᒍᑦ ᑕᐃᒎᓯᖅ ᐊᕕᒃᑐᖅᓯᒪᔪᓂᒃ ᓴᐅᓂᕕᓂᐊᖅᓯᐅᕐᕕᐅᓚᐅᖅᑐᒥ. ᐆᒪᔪᐃᑦ ᐊᔾᔨᒌᙱᓐᓂᖏᑦ ᑕᐃᒎᓯᖅ wakei ᐃᖅᑲᐅᒪᔭᐅᓪᓗᓂ ᐃᓅᔪᓐᓃᕐᓂᑯ ᑕᐃᕕᑦ ᐅᐄᒃ, ᖃᐅᔨᒪᔭᐅᑦᑎᐊᖅᑐᖅ ᐆᒪᔪᓕᕆᔨᕕᓂᖅ California Berkeley−ᒥ ᓯᓚᑦᑐᖅᓴᕐᕕᒡᔪᐊᕐᒥ.
ᑖᒻ ᓯᑑᕙᑦ, PhD, ᐊᒻᒪ ᔭᔅᑎᓐ ᓛᒻᐴᒡ, PhD, ᖃᐅᔨᓴᖅᑎᙳᕆᐅᖅᓴᔪᑦ UChicago-ᒥ, ᐊᔾᔨᓕᐅᖅᑕᐅᓂᑯ ᐅᔭᕋᖅ CT ᐊᔾᔨᓕᐅᕈᑎᒃᑯᑦ ᓂᕐᔪᑎᕕᓂᖅ ᐃᓚᓕᐅᑎᓯᒪᓗᒍ ᑕᓕᕈᐊᖓᓗ ᖃᐅᔨᓚᐅᖅᖢᓂᐅᒡᓗ ᐅᔾᔨᕐᓇᖅᑐᒻᒪᕆᖕᓂ ᑕᐅᑦᑐᖃᖅᖢᓂ. ᐱᓕᕆᔩᑦ ᖃᐅᔨᓴᖅᑕᖓᑕ ᐃᓂᖓ, ᓲᕐᓗ ᑎᒃᑖᓕᒃ, ᖃᓂᒋᔭᐅᓪᓗᓂ ᐆᒪᔪᕐᓄᑦ ᓴᖅᑭᕐᖓᓚᐅᖅᓯᒪᔪᓄᑦ ᑕᓪᓕᒪᓂ ᐳᔾᔫᑎᖃᖅᑰᔨᓪᓗᑎᒃ. ᐃᒪᐃᒃᑲᓗᐊᖅᑎᓪᓗᒍᓗ ᕿᑭᖅᑖᓂᐊᑉ ᑕᓕᕈᕕᓂᐊ ᓈᒻᒪᖕᓂᖅᓴᐅᒐᓗᐊᖅᑎᓪᓗ ᐃᒫᒍᑦ ᐳᐃᔾᔪᕌᕈᑎᒋᓗᒍ, ᐃᖃᓘᖅᑰᔨᙱᑎᐊᖅᖢᓂ. ᓴᖑᖓᔪᖅ ᐸᐅᖅᑎᑐᑦ ᑕᐅᑦᑐᓕᒃ ᐊᓯᐊᓃᓚᐅᖅᖢᓂ, ᐊᔾᔨᒋᔭᐅᙱᖦᖢᓂ ᓇᒡᒍᐊᖓᓃᑦᑐᒥᒃ, ᓂᐅᖏᓐᓃᑦᑐᒥᒃ ᓄᑭᖏᑎᑐᑦ ᐅᕝᕙᓘᓐᓃᑦ ᐊᓂᖓᓪᓗᓂ ᑕᓕᕈᖏᑦ ᑕᑯᓯᒪᔭᑦᑎᓐᓂ ᑎᓴᒪᓂᒃ ᓂᐅᓕᖕᓂᒃ ᐱᓱᒃᑎᓂᒃ ᐊᒻᒪ ᐃᖃᓗᖕᓂ ᑕᑯᕙᒃᑕᑦᑎᓐᓂ ᐅᓪᓗᒥ.
ᖃᐅᔨᓴᕐᓂᖅ ᐃᑲᔪᖅᓱᖅᑕᐅᓚᐅᖅᐳᖅ ᐳᕆᓐᓴᓐ−ᑯᑦ ᑐᙵᕕᖓᓐᓂ, ᐃᓕᓐᓂᐊᕐᕕᒃ ᓄᓇᒥᙶᖅᑐᓂᒃ ᖃᐅᔨᓴᕈᑎᓂᒃ Drexel ᓯᓚᑦᑐᖅᓴᕐᕕᒡᔪᐊᕐᒥ, Chicago-ᒥ ᐆᒪᔪᓂᒃ ᖃᐅᔨᓴᕐᕕᖕᒥ ᓯᓚᑦᑐᖅᓴᕐᕕᒡᔪᐊᕐᒥ, ᐃᒃᑲᑦᑐᔮᒃᑯᑦ ᐱᓕᕆᐊᑦ ᐊᕙᑎᓕᕆᔨᒃᑯᑦ ᑲᓇᑕᒥ, ᓄᓇᕗᑦ ᒐᕙᒪᒃᑯᓐᓂ, ᐃᓕᖅᑯᓯᓕᕆᔨᒃᑯᑦ ᓄᓇᕘᒥ ᐃᑦᑕᕐᓂᓴᓕᕆᕝᕕᖕᒥ ᑎᑎᕋᕐᕕᒃ, ᕼᐋᒻᒪᓚᒃᑯᑦ ᐊᒻᒪ ᐊᖑᓇᓱᒃᑐᓕᕆᔨᒃᑯᑦ ᐊᐅᓱᐃᑦᑐᕐᒥ, ᐊᒻᒪ ᑲᓇᑕᒥ ᖃᐅᔨᓴᖅᑐᓕᕆᔨᒃᑯᓐᓂ
